मार्मिक महाराष्ट्र न्यूज नेटवर्क / संतोष अवचार :-
हिंगोली – जिल्ह्याचे डॅशिंग पोलीस अधीक्षक जी. श्रीधर यांनी हिंगोली चा पदभार स्वीकारल्यानंतर जिल्ह्यातील गुन्हेगारी कमी करणे, प्रलंबित गुन्हे व तक्रार अर्ज प्रकरणांचा जलद गतीने निपटारा करणे, लपून छपून सुरू असलेले अवैध धंद्यावर कार्यवाही मोहीम तसेच जनता व पोलीस सुसंवाद अधिकाधिक वाढावा यासाठी विविध उपक्रम घेतले जात आहेत.
दामिनी पथक, पेट्रोलिंग, भरोसा सेल, पोलीस दीदी / काका उपक्रम, जातीय सलोखा, सामाजिक सदभावना वाढीसाठी कौमी एकता क्रिकेट स्पर्धेचे आयोजन, सतर्क रात्रगस्त व कोंबिंग ऑपरेशन आदी माध्यमातून चोरीच्या घटनांना आळा बसावा यासाठी प्रयत्न करत आहेत.
जिल्ह्यातील सर्व तेराही पोलीस ठाण्यामध्ये वरील सर्व बाबी व इतर प्रमुख बाबीनुसार प्रभावी कामगिरी व्हावी यासाठी पोलीस अधीक्षक यांनी प्रत्येक महिन्यात सर्व 13 ही पोलीस ठाण्याच्या कामगिरीचे मूल्यांकन करून व सर्वंकष बाबींचा आढावा घेऊन उत्कृष्ट कामगिरी करणाऱ्या टॉप तीन पोलीस ठाण्यांची निवड करून त्यांना प्रशस्तीपत्र व बक्षीस देण्याची योजना सुरू केली आहे.
या योजनेनुसार माहे नोव्हेंबर 2022 या महिन्याच्या मासिक अहवालाचे व जिल्ह्यातील सर्व पोलीस ठाण्याच्या कामगिरीचे अवलोकन व मूल्यांकन करून उत्कृष्ट कामगिरी करणाऱ्या टॉप तीन पोलीस ठाण्याची निवड करण्यात आली आहे.
त्यानुसार सर्वाधिक गुण प्राप्त करून व उत्कृष्ट कामगिरी करून हट्टा पोलीस ठाणे यांनी पहिला तर कुरुंदा पोलीस ठाणे यांनी द्वितीय व आखाडा बाळापूर पोलीस ठाणे यांनी तृतीय क्रमांक पटकावला.
नमूद पोलीस ठाण्याचे प्रभारी अधिकारी हट्टा येथील सहाय्यक पोलीस निरीक्षक गजानन बारोटे यांना प्रथम क्रमांक बद्दल प्रशस्तीपत्र व दोन हजार रुपये रोख बक्षीस सोबत सी – नोट, द्वितीय क्रमांकाबद्दल कुरुंदा पोलीस ठाण्याचे प्रभारी अधिकारी गजानन मोरे यांना प्रशस्तीपत्र व 1500 रुपये रोख बक्षीस सोबत सी – नोट, तर तृतीय क्रमांकाबद्दल आखाडा बाळापूर पोलीस ठाण्याचे प्रभारी अधिकारी सहाय्यक पोलीस निरीक्षक पंढरीनाथ बोधनापोड यांना 1000 रुपये रोख बक्षीस व सोबत सी – नोट असे बक्षीस पोलीस अधीक्षक यांच्याकडून जाहीर करण्यात आले आहे.
