मार्मिक महाराष्ट्र न्यूज नेटवर्क / संतोष अवचार :-
हिंगोली – जिल्ह्याचे डॅशिंग पोलीस अधीक्षक जी. श्रीधर यांनी नांदेड येथून हिंगोली व यवतमाळ जिल्ह्यात सराईतपणे गुन्हे करणाऱ्या तिसऱ्या आरोपीस दणका दिला आहे. विशेष म्हणजे आठवड्यातील ही तिसरी कारवाई असून एकूण 3 आरोपी विरुद्ध एमपीडीए कायद्याअंतर्गत कार्यवाही करण्यात आली आहे.
हिंगोली चे डॅशिंग पोलिस अधीक्षक जी. श्रीधर यांनी जिल्ह्याचा पदभार स्वीकारताच जिल्ह्यातील सराईत गुन्हेगार व सतत गुन्हे करणाऱ्या विरुद्ध कठोर कार्यवाहीची भूमिका घेऊन अशा प्रकारचे गुन्हे करणाऱ्या आरोपींची इत्यंभूत माहिती काढून ते करत असलेल्या गुन्ह्यांना प्रभावीपणे प्रतिबंध करण्यासाठी त्यांच्याविरुद्ध महाराष्ट्र पोलीस कायदा फौजदारी प्रक्रिया संहिता व एमपीडीए कायदा अन्वय प्रभावी प्रतिबंधक कार्यवाही केली जात आहे.
मागील अनेक वर्षापासून जॉकी बाबाजी चव्हाण (वय 28 वर्ष रा. सोनारी ता. हिमायतनगर जि. नांदेड) हा नांदेड जिल्ह्यात राहून इतर आरोपींना सोबत घेऊन यवतमाळ व हिंगोली जिल्ह्याच्या सीमेवरील गावांमध्ये मोठ्या प्रमाणात व सतत चोरी, घरफोडी, दुखापत करून जबरी चोरीचे गुन्हे व दरोडाचे गुन्हे त्याने केलेले आहेत.
त्याच्या विरुद्ध हिंगोली जिल्ह्यात वसमत ग्रामीण पोलीस ठाणे व आखाडा बाळापूर येथे गंभीर स्वरूपाचे सहा गुन्हे आणि यवतमाळ जिल्ह्यात 6 गुन्हे असे एकूण 12 गुन्हे शरीराविरुद्धचे व मालमत्ता विरुद्ध चे गंभीर स्वरूपाचे गुन्हे दाखल आहेत. तो अशा प्रकारचे सतत गंभीर गुन्हे करत असल्याने समाजासाठी धोकादायक बनला होता.
त्याच्या कृत्यामुळे परिसरातील ग्रामस्थात भीती व असुरक्षिततेची भावना निर्माण झाली होती. तो गंभीर स्वरूपाचे दखलपात्र गुन्हे करत असल्याने समाज स्वास्थ्यास व सार्वजनिक सुव्यवस्थेस बाधा पोहोचविणारा धोकादायक इसम ठरला होता.
म्हणून जिल्हा पोलीस अधीक्षक यांच्या आदेशाने सदर प्रकरणी सहाय्यक पोलीस निरीक्षक अनिल काचमांडे पोलीस स्टेशन वसमत ग्रामीण यांनी व प्रभारी उपविभागीय पोलीस अधिकारी वसमत चंद्रशेखर कदम यांच्या मार्फत नमूद इसमाविरुद्ध महाराष्ट्र झोपडपट्टी, हातभट्टीवाले, औषधे द्रव्य विषयक गुन्हेगार, धोकादायक व्यक्ती, दृकश्राव्य कालवकृतींचे विनापरवाना प्रदर्शन करणाऱ्या व्यक्ती (व्हिडिओ पायरेट्रस, वाळू तस्कर आणि अत्यावश्यक वस्तूंचा काळाबाजार करणाऱ्या व्यक्ती ह्यांच्या विघातक कृत्यांना आळा घालण्याबाबतचा अधिनियम 1981 MPDA) अंतर्गत अंतर्गत कार्यवाही बाबत प्रस्ताव डॅशिंग पोलिस अधीक्षक जी. श्रीधर यांच्याकडे सादर केला होता.
पोलीस अधीक्षक हिंगोली यांनी सदरचा प्रस्ताव जिल्हाधिकारी हिंगोली यांच्याकडे पाठविला होता.
हिंगोली जिल्हाधिकारी जितेंद्र पापळकर यांनी सदर प्रस्तावाची संपूर्ण सविस्तर पडताळणी करून नमूद व्यक्ती नावे जॉकी बाबाजी चव्हाण (वय 28 वर्षे रा. सोनारी ता. हिमायतनगर जि. नांदेड) हा एक सार्वजनिक सुव्यवस्थेस बाधक ठरून धोकादायक व्यक्ती बनल्याने त्यास एमपीडीए कायदा 1981 सुधारणा (1996, 2009 आणि 2015) कलम 3(1) अन्वय एका वर्षासाठी स्थानबद्धतेचे आदेश निर्गमित केले आहेत.
