मार्मिक महाराष्ट्र न्यूज नेटवर्क / संतोष अवचार :-
हिंगोली – येथील जिल्हा पोलिसांनी पोलीस अधीक्षक जी. श्रीधर यांच्या आदेशाने उल्लेखनीय कामगिरी करत 13 अटक वॉरंट व एक पोटगी वॉरंट मधील व्यक्तींना पकडून न्यायालयात हजर केले आहे.
हिंगोली पोलीस अधीक्षक जी. श्रीधर यांच्या आदेशाने गुन्हे प्रतिबंध व गुन्हेगारांवर वचक राहावी म्हणून विशेष कोंबिंग ऑपरेशन व प्रतिबंध कार्यवाही तसेच अवैध धंद्यांविरोधात विशेष कार्यवाहीची मोहीम राबविली जात आहे.
त्याच सोबत पोलीस अधीक्षक यांच्या आदेशाने व मार्गदर्शनात प्रत्येक आठवड्यात प्रलंबित न्यायालयीन प्रकरणांचा लवकरात लवकर निपटारा व्हावा, न्यायालयात साक्षीदार व आरोपी हे वेळेवर समन्स व वॉरंटनुसार हजर व्हावेत यासाठी प्रयत्न केले जातात.
परंतु न्यायालयाकडून वेळोवेळी समन्स निघूनही तारखेवर हजर न राहणाऱ्या आरोपी विरुद्ध न्यायालयाकडून अजामीनपात्र व जामीनपात्र वॉरंट काढण्यात येते. सदर वॉरंटची बजावणीची विशेष मोहीम राबविण्यात येते.
21 नोव्हेंबर रोजी पोलीस अधीक्षक जी. श्रीधर यांच्या आदेशाने व अप्पर पोलीस अधीक्षक अर्चना पाटील यांच्या मार्गदर्शनात जिल्ह्यातील सर्वच पोलीस ठाणे अंतर्गत अजामीनपात्र, जामीनपात्र वॉरंट, पोटगी वॉरंट बाबत विशेष मोहीम घेण्यात आली.
सदर मोहिमेत जिल्ह्यातील सर्व पोलीस ठाण्याचे प्रभारी अधिकारी व दुय्यम अधिकारी तसेच अंमलदार सहभागी झाले होते.
या मोहिमेत विशेष कामगिरी करताना पोलिसांनी न्यायालयाकडून अनेक वेळा समन्स निघूनही तारखेवर न्यायालयात हजर न राहणाऱ्या व ज्यांच्याबाबत न्यायालयाकडून अटक वॉरंट निघाले होते अशा एकूण 38 अटक वॉरंटची बजावणी करण्यात आली. त्यातील 13 व्यक्तींना पकडून न्यायालया समक्ष हजर करण्यात आले.
तसेच पोटगी वॉरंट 4 तालीम केले असून त्यापैकी एका व्यक्तीस पकडून न्यायालया समक्ष हजर करण्यात आले. तसेच सदर मोहिमेत वॉरंटची संबंधितांना बजावणी करण्यात आली.
