मार्मिक महाराष्ट्र न्यूज नेटवर्क / संतोष अवचार :-
हिंगोली – विविध सोशल मीडिया पेजवरून आक्षेपार्य मजकूर पोस्ट करणाऱ्या एकूण 16 वापरकर्त्यांना प्रतिबंध करण्यासाठी फौजदारी प्रक्रिया संहितेच्या कलम 149 अन्वये नोटीस बजावण्यात आली आहे. सदरील कारवाई हिंगोली येथील सायबर सेल विभागाने केली आहे.
हिंगोली पोलीस अधीक्षक जी. श्रीधर यांनी जिल्ह्यातील सामाजिक शांतता व जातीय सलोखा टिकून राहावा तसेच सोशल मीडियाचा वापर करून त्यात बाधा येऊ नये, त्यावर प्रतिबंध व्हावा. त्याचप्रमाणे सायबर गुन्हेगारीवर आळा बसावा म्हणून पोलीस अधीक्षक कार्यालय येथील सायबर सेल विभागास विशेष सूचना व मार्गदर्शन करून कार्यरत केले आहे.
सदर पथक पोलीस अधीक्षक जी. श्रीधर, अप्पर पोलीस अधीक्षक अर्चना पाटील यांच्या नेतृत्वात स्थानिक गुन्हे शाखा पोलीस निरीक्षक विकास पाटील यांच्या मार्गदर्शनात सहाय्यक पोलीस निरीक्षक शिवसांब घेवारे, पोलीस अंमलदार दीपक पाटील, दत्तात्रय नागरे, इरफान पठाण, महिला पोलीस शिपाई प्रणिता मोरे यांची नेमणूक करण्यात आली आहे.
सदरील सायबर सेल विभागाने मागील आठवड्यात 19 ते 25 डिसेंबर या दरम्यान आक्षेपार्ह पोस्ट करणाऱ्या व्हाट्सअप च्या 11 व फेसबुक च्या 5 अशा एकूण 16 वापरकर्त्यांना प्रतिबंध करण्यासाठी फौजदारी प्रक्रिया संहितेच्या कलम 149 अन्वये नोटीस दिली आहे.
सदरील सायबर सेलची टीम सोशल मीडियावर विविध समाजात जाती – धर्मात तेढ निर्माण होईल तसेच महापुरुषांची विटंबना होईल व सार्वजनिक शांततेला बाधा पोहोचेल अशा प्रकारच्या आक्षेपार्ह पोस्ट करणाऱ्यांवर लक्ष ठेवून त्यावर कार्यवाही करत आहे.
तसेच अशा प्रकारे जाती – धर्मात तेढ निर्माण करणारे तसेच अफवा पसरवून सार्वजनिक शांतता भंग करणाऱ्या व्यक्तीवर माहिती तंत्रज्ञान कायद्यान्वय व भारतीय दंड संहिता अन्वय गुन्हा नोंद करण्यात येणार असून असे कृत्य करणाऱ्यांची जेलवारी अटळ असल्याचे जिल्हा पोलीस अधीक्षक जी. श्रीधर यांनी सांगितले आहे.
