मार्मिक महाराष्ट्र न्यूज नेटवर्क / संतोष अवचार :-
हिंगोली – येथील पोलीस अधीक्षक जी. श्रीधर यांच्या मार्गदर्शनाखाली जिल्ह्यात एकाच वेळी कोंबिंग ऑपरेशन राबविण्यात आले. यामध्ये जिल्ह्यातील एकूण 48 ठिकाणी जेथे रेकॉर्डवरील व सराईत गुन्हेगार आहेत अशा ठिकाणी पोलीस पथकाकडून गुन्हेगार तपासणी करण्यात आली. तसेच या मोहिमेदरम्यान चोरी करण्याचे उद्देशाने फिरणाऱ्या तिघांवर जिल्ह्यातील विविध पोलीस ठाण्यात गुन्हा दाखल करण्यात आला.
हिंगोली पोलीस अधीक्षक जी. श्रीधर यांनी जिल्ह्यातील सराईत गुन्हेगार व लपून – छपून चालणारे अवैध धंद्याबाबत कठोर भूमिका घेतली आहे तसेच गंभीर गुन्ह्यातील आणि चोरी, जबरी चोरी, घरफोडी व दरोडा या गुन्ह्यातील आरोपींना नियमित तपासणे व त्यांच्याविरुद्ध कठोर प्रतिबंधक कार्यवाही सुरू केले आहे.
त्याचाच एक भाग म्हणून गुन्हेगारांची तपासणी, अवैध धंद्याविरुद्ध कार्यवाही, फरार व पाहिजे तसेच न्यायालयाचे वॉरंट मधील आरोपी शोध अशा व्यापक हेतूने पोलीस अधीक्षक जी. श्रीधर यांच्या मार्गदर्शनात 6 फेब्रुवारी रोजी रात्री 11 वाजेपासून 7 फेब्रुवारी रोजी पहाटे 5 वाजेपर्यंत संपूर्ण जिल्ह्यात सर्वच पोलीस ठाणे अंतर्गत विशेष ऑपरेशन राबविण्यात आले.
सदर मोहिमेत अप्पर पोलीस अधीक्षक अर्चना पाटील, उपविभागीय पोलीस अधिकारी संदिपान शेळके, उपविभागीय पोलीस अधिकारी सुरेश दळवे, उपविभागीय पोलिस अधिकारी संजय हिवारे, स्थानिक गुन्हे शाखा पोलीस निरीक्षक विकास पाटील, पोलीस निरीक्षक नरेंद्र पाडळकर, पोलीस निरीक्षक चंद्रशेखर कदम, पोलीस निरीक्षक गणेश राहिरे, पोलीस निरीक्षक दीपक बोरसे, पोलीस निरीक्षक विष्णुकांत गुट्टे, पोलीस निरीक्षक कुंदन कुमार वाघमारे,
सहाय्यक पोलीस निरीक्षक अनिल काचमांडे, सहाय्यक पोलीस निरीक्षक गजानन बोराटे, सहाय्यक पोलीस निरीक्षक सुनील गोपीनवार, सहाय्यक पोलीस निरीक्षक विलास चवळी, सहाय्यक पोलीस निरीक्षक राम निरदोडे, सहाय्यक पोलीस निरीक्षक रवी हुंडेकर, सहाय्यक पोलीस निरीक्षक अरुण नागरे, तसेच स्थानिक गुन्हे शाखेचे सहाय्यक पोलीस निरीक्षक राजेश मलपिल्लू, सहाय्यक पोलीस निरीक्षक शिवसांब घेवारे, पोलीस उपनिरीक्षक विक्रम विठूबोने व सर्वच पोलीस ठाण्यामधील दुय्यम पोलीस अधिकारी तसेच मोठ्या प्रमाणात पोलीस अंमलदार सहभागी झाले होते.
या मोहिमेत जिल्ह्यातील एकूण 48 ठिकाणी जेथे रेकॉर्डवरील व सराईत गुन्हेगार आहेत अशा ठिकाणी पोलीस पथकाकडून गुन्हेगार तपासणी करण्यात आली.
तसेच जिल्ह्यातील मोक्कामधील फरार व तडीपार आदेश झालेले तसेच फरार व पाहिजे असलेले आरोपींचीही तपासणी करून सदर मोहिमेत न्यायालयाकडून वेळोवेळी समन्स निघूनही न्यायालयात हजर राहत नव्हते व ज्यांच्या बाबत न्यायालयाकडून अटक वॉरंट निघाले होते अशा व्यक्तीविरुद्ध एकूण 6 अटक वॉरंट व 5 जमानति वॉरंटची बजावणी करण्यात आली.
जिल्ह्यात सर्वच पोलीस ठाणे अंतर्गत महत्त्वाच्या ठिकाणी नाकाबंदी करण्यात येऊन वाहनांची कसून तपासणी करण्यात आली. तर अंधाराचा फायदा घेऊन चोरी करण्याच्या उद्देशाने संशयास्पदरीत्या मिळून आलेल्या व्यक्तींविरुद्ध हिंगोली शहर पोलीस ठाणे, कळमनुरी व वसमत शहर पोलीस ठाणे येथे एकूण 3 व्यक्ती विरुद्ध कलम 122 महाराष्ट्र पोलीस कायदा, एकूण 1 व्यक्तीविरुद्ध कलम 142 महाराष्ट्र पोलीस कायदा अन्वये गुन्हा दाखल करण्यात आला चार अवैध धंद्याविरोधात कार्यवाही करण्यात आली.
