मार्मिक महाराष्ट्र न्यूज नेटवर्क / संतोष अवचार :-
हिंगोली – जिल्ह्याचे डॅशिंग पोलीस अधीक्षक जी. श्रीधर यांनी कळमनुरी येथील एका सराईत गुन्हेगारावर कार्यवाही करत त्यास एमपीडीए कायद्याअंतर्गत एका वर्षासाठी स्थानबद्ध केले आहे पोलीस अधीक्षक यांनी केलेली ही 10 वी कार्यवाही आहे.
हिंगोली चे डॅशिंग पोलिस अधीक्षक जी. श्रीधर यांनी जिल्ह्याचा पदभार स्वीकारताच जिल्ह्यातील सराईत गुन्हेगार व सतत गुन्हे करणाऱ्या विरुद्ध कठोर कार्यवाहीची भूमिका घेत अशा प्रकारचे गुन्हे करणाऱ्या आरोपींची इत्यंभूत माहिती काढून ते करत असलेल्या गुन्ह्यांना प्रभावीपणे प्रतिबंध करण्यासाठी त्यांच्याविरुद्ध महाराष्ट्र पोलीस कायदा फौजदारी प्रक्रिया संहिता व एमपीडीए कायद्यान्वये प्रभावी प्रतिबंधक कार्यवाही केली जात आहे.
त्यानुसार मागील अनेक वर्षांपासून संजय उर्फ समीर पंडित नामनूर (वय 30 वर्ष रा. मदिना नगर कळमनुरी, हल्ली मुक्काम महबूबनगर नुरी चौक नांदेड तालुका जिल्हा नांदेड हा मागील अनेक वर्षांपासून नांदेड शहरातील भाग्यनगर, इतवारा, शिवाजीनगर पोलीस ठाणे तसेच हिंगोली जिल्ह्यातील कळमनुरी पोलीस ठाणे अंतर्गत चोरी, घरफोडी, जबरी चोरी, दरोडा अशा मालमत्ता व शरीराविरुद्धचे गंभीर स्वरूपाचे गुन्हे सतत करत आहे.
त्याच्या विरोधात कळमनुरी पोलीस ठाणे येथे 2 तर नांदेड शहरातील पोलीस ठाणे भाग्यनगर, शिवाजीनगर येथे 8 असे गंभीर स्वरूपाचे 10 गुन्हे दाखल आहेत. तो अशा प्रकारचे सतत गंभीर गुन्हे करत असल्याने समाजासाठी धोकादायक बनला होता.
त्याच्या कृत्यामुळे परिसरातील नागरिकांमध्ये भीती व असुरक्षिततेची भावना निर्माण झाली होती. तो गंभीर स्वरूपाचे दखलपात्र गुन्हे करत असल्याने समाज स्वास्थ्यास व सार्वजनिक सुव्यवस्थेस बाधा पोहोचविणारा धोकादायक इसम बनला होता.
म्हणून पोलीस अधीक्षक यांच्या आदेशाने सदर प्रकरणी पोलीस निरीक्षक वैजनाथ मुंडे यांनी उपविभागीय पोलिस अधिकारी विवेकानंद वाखारे यांच्या मार्फतीने नमूद इसमाविरुद्ध महाराष्ट्र झोपडपट्टी, हातभट्टीवाले, औषधी द्रव्य वितरण गुन्हेगार, धोकादायक व्यक्ती, दृकश्राव्य कालवकृतीचे विनापरवाना प्रदर्शन करणाऱ्या व्यक्ती (व्हिडिओ पायट्रेस, वाळू तस्कर आणि अत्यावश्यक वस्तूंचा काळाबाजार करणाऱ्या व्यक्ती यांच्या विघातक कृत्यांना आळा घालण्याबाबतचा अधिनियम 1981 (एम पी डी ए) अंतर्गत कार्यवाही बाबत प्रस्ताव डॅशिंग पोलीस अधीक्षक जी. श्रीधर यांच्याकडे सादर केला होता.
पोलीस अधीक्षक यांनी सदर प्रस्तावाची सखोल चौकशी करून सदरचा प्रस्ताव हिंगोली जिल्हाधिकारी यांच्याकडे पाठविला होता.
जिल्हाधिकारी जितेंद्र पापळकर यांनी सदर प्रस्तावाची संपूर्ण सविस्तर पडताळणी करून नमूद इसम नामे संजय उर्फ समीर पंडित नामनूर हा एक सार्वजनिक सुव्यवस्थेस बाधक करून धोकादायक व्यक्ती बनल्याने त्यास एमटीडीए कायदा 1981 (सुधारणा 1996 2009 आणि 2015) कलम 3 (1) अन्वये एका वर्षासाठी स्थानबद्धतेचे आदेश निर्गमित केले आहेत.
