सतत गुन्हे करणारे औंढा नागनाथ येथील दोघे एक वर्षासाठी जिल्ह्यातून हद्दपार

मार्मिक महाराष्ट्र न्यूज नेटवर्क / संतोष अवचार :-

हिंगोली – सतत गुन्हे करणाऱ्या औंढा नागनाथ येथील दोघांना हिंगोली पोलीस अधीक्षक जी. श्रीधर यांनी एका वर्षासाठी जिल्ह्यातून हद्दपार केले आहे. सदरील कारवाई कलम 55 महाराष्ट्र पोलीस कायदा अन्वय करण्यात आली.

हिंगोली पोलीस अधीक्षक जी. श्रीधर यांनी जिल्ह्यातील सराईत गुन्हेगार व अवैध धंदे चालविणाऱ्या विरुद्ध तसेच टोळीने गुन्हेगारी कृत्य करणाऱ्या विरुद्ध कठोर कार्यवाहीची भूमिका घेत असे गुन्हे सराईत करणाऱ्या विरुद्ध प्रभावी प्रतिबंधक कार्यवाही केली जात आहे.

पोलीस अधीक्षक जी. श्रीधर यांनी नरसी नामदेव पोलीस ठाणे हद्दीत राहणारे सराईत गुन्हेगार दीपक वसंतराव जगताप (वय 45 वर्ष) व विठ्ठल शेषराव आम्ले (वय 32 वर्षे, दोन्ही रा. औंढा नागनाथ ता. औंढा नागनाथ जि. हिंगोली) यांच्या विरुद्ध औंढा नागनाथ पोलीस ठाण्यात शरीराविरुद्धचे दोन गुन्हे दाखल आहेत.

सदरील गुन्हेगार सतत संघटितपणे गुन्हे करतच आहेत. त्यांच्या वर्तनात कोणताही बदल होत नसल्याने व त्यांचे अशा गुन्हेगारी प्रवृत्ती व हालचालीमुळे परिसरातील नागरिकांच्या शरीराविरुद्ध धोका उत्पन्न होत असल्याने पोलीस अधीक्षक यांनी सदर प्रकरणी कठोर प्रतिबंध कार्यवाही बाबत आदेश दिले.

यावरून औंढा नागनाथ पोलीस ठाण्याचे पोलीस निरीक्षक गणेश राहिरे यांच्या मार्गदर्शनाखाली पोलीस उपनिरीक्षक एम. व्ही. सावंत यांनी नमूद आरोपींविरुद्ध कलम 55 महाराष्ट्र पोलीस कायदा अन्वय हद्दपारचा प्रस्ताव सादर केला होता.

सदर प्रस्तावाची चौकशी विभागीय पोलीस अधिकारी हिंगोली शहर उपविभाग यांनी करून नमूद आरोपींच्या टोळीस हिंगोली जिल्ह्यातून हद्दपार करण्याबाबत हिंगोली पोलीस अधीक्षक यांच्याकडे शिफारस केली.

यावरून नमूद प्रकरणी सविस्तर तपासणी करून पोलीस अधीक्षक जी. श्रीधर यांनी त्यांना प्राप्त महाराष्ट्र पोलीस अधिनियम कलम 55 अन्वय नमूद दोन आरोपींना आज पासून पुढील एक वर्षासाठी हिंगोली जिल्ह्यातून हद्दपार केल्या बाबत आदेश काढले आहेत.

पोलीस अधीक्षक जी. श्रीधर हे समाजात शांतता नांदावी म्हणून सराईत गुन्हेगारांची माहिती घेऊन त्यांच्याबाबत कोंबिंग व ऑल आऊट ऑपरेशन मधून त्यांची नियमित तपासणी तसेच त्यांच्या बाबत कठोर प्रतिबंध कार्यवाही करत आहेत.